百萬 Blogger財叔:10萬元電單車位 值得投資嗎?
發布時間: 2016/09/30 12:29
最後更新: 2016/09/30 13:33
▲ (相片來源:經濟日報資料室)
近期收到好多私訊,個個第一句都話係我讀者,但一問問題就露晒底,最好笑有個問我騰訊(00700)買唔買得過?我話佢連我寫乜都未知!哈哈!如果真係我讀者,點會唔知我唔會私下答問題呢?
其實我唔私下答問題嘅原因,係憑三言兩語我唔敢俾任何意見,如果我講完你就去做,一陣衰咗就會話我老點,咁你可能話隨便問下我意見啫,咁咪即係浪費我時間?如果係我讀者,應該知我是希望分享我嘅經驗而令人得到啟發,因為投資同投機最緊要都係計自己條數。
400萬車位 跌破眼鏡
好似早前有個屋苑車位開售,物業共358伙,可供出售車位共139個(1:2.5),價格由320萬至400萬元。四房單位佔144個,有優先認購權及50萬優惠,即折扣後為270萬至350萬元。
發展商首批推出119個車位予四房單位認購,有朋友跟我打賭,認為必定一Q清袋,佢都諗住買返個自用,但我則認為一定賣唔晒!
原因係四房單位業主必定有投資者,是投資者便必定會計數。以300多萬元去買一個車位投資,情願去買一個300萬元的單位,收租約1萬元,相信這些車位月租不會有1萬元吧!而且屋苑旁邊的大廈車位月租也只是3,000元左右!結果如我所料,一Q未能清袋,賣剩約20個車位。
當大家覺得我好似好有料到嘅時候,已經有車位火速摸出,賺20萬!好勁咩?第日再有個賺30萬!一個月後賺過百萬都有!最高車位成交價為410萬元,貴絕港島東!我當然跌到一地眼鏡碎片啦!好在我朋友無聽我講照買咗,唔係就瀨嘢啦!
蹺唔怕舊 最緊要受
9月中,發展商再推17個私家車位及15個電單車位,公開俾所有業主參與,我朋友又即刻搵我打賭,話電單車位應該開50萬至70萬元一個,我話無可能,最多唔會超過15萬元,因為電單車位從來都唔值錢,好似貝沙灣都係幾萬蚊一個,仲要賣咗好耐都賣唔晒!結果價單一開,電單車位只是劃一10萬元一個。
但原來真係得我一個睇得咁唔值錢,朋友原本話幫我認購一個,點知附近竟然真係有停車場乘機拆售,電單車位真係開50萬至70萬元一個!我朋友都即刻轉軚話要買來炒返轉,我當然唔會阻人發達啦!
不過呢個明顯係「扑傻瓜」遊戲,邊個買咗50萬元一個電單車位,我一定笑佢一世!不過放心,一定有人買,因為一般人都會覺得私家車位400幾萬元,電單車位平咁多好抵喎!又正如住宅賺到幾個錢就發夢一舖養三代,劏場賣完一個又一個,大把水魚等上釣!
我發現真係蹺唔怕舊,最緊要受,只要你睇準香港人怕蝕底心態,首次推少少單位,製造一兩個摸貨成交,之後就唔愁清唔到貨,唔信?得閒留意一下,好多地產商都會分幾期出售,只要第一批賣得晒,第二批加啲價,啲人就驚蝕底,唔買下期又可能再加,以為真係早買早享受,遲買又要貴幾舊,賣樓者最想見咪就係呢啲「精明消費者」囉!講到發達我真係無機會啦!正一無膽鬼!
【其他熱話】《嘩鬼上學去》凱莉山國際學校 香港分校學費要幾錢?
【其他熱話】營養師拆解豉油成分陷阱 愈食愈重口味
【其他熱話】麥記Bagel早餐包 食一個如吞兩碗半飯
全文刊於《iMoney智富雜誌》第466期(收費閲讀),標題經TOPick修改,原題為「扑傻瓜」。
《iMoney智富雜誌》facebook
撰文 : 百萬Blogger 財叔 iMoney智富雜誌